Терлекчелек ырамлы бара

    Кышлату чорында хуҗалыклар кассасына табыш кертүнең төп чыганагы – терлекчелек. Шуңа да бар көч терлекчелек тармагында мөмкин кадәр күбрәк продукция җитештерүгә юнәлдерелгән булырга тиеш. Районыбыз терлекчеләре шуны истә тотып эш итәләр дә. Районда иң беренчеләрдән булып герефорд токымлы маллар үрчетеп, мул табыш алып эшләп килүче “Гайфутдинова” хуҗалыгында кышлату чоры уңышлы бара. Бүгенге көндә биредә 1280 баш үгезләр, 230 баш бозаулар асрала. Алты айга җиткән бозаулар фидлотка чыгарыла. Аларның туклану рационын хуҗалык зоотехнигы Ленар Баһауов тикшереп тора.

    – Әлеге вакытта хуҗалыкта мал асларына салам кертү эше башкарыла. Чөнки безнең маллар ачык җирдә асрала, шуңа күрә бераз салкынайту белән без аларның асларына салам түшибез. Азык та җитәрлек. Кукуруз культурасыннан салынган силос, фураж һәм минераль комплекслы витаминнар белән баетып тукландырабыз. Фидлотта күпчелек эш техника ярдәме белән башкарыла. Тик бозаулар асралган абзарда гына кул көче таләп ителә. Бозаулар тәүлегенә 1050 граммнан артым алып бара, аларның авырлыгы 200 килограммга җиткәч, фидлотка чыгарабыз, ә симертелгән үгезләр 500 килограммнан артык авырлык җыйгач, ит җитештерү комбинатына озатыла. Шулай ук таза һәм сәламәт маллар үстерүдә район ветеринария станциясе хезмәткәрләренең дә өлеше зур. Алар белән тыгыз бәйләнештә булып, бергә төрле профилактик чаралар үткәреп торабыз,–ди хуҗалык зоотехнигы.