ИКТЕШЛЫМЕ СЕМИНАРЫМ ЭРТАРЕНЫТ

Башкортостан Вуйлык Радий Хабиров сентябрьысе указыштыже кундемыште шӧрым шукырак лӱшташ да шылым утларак ямдылаш шӱден. Тиде шонымашыш шуаш вольык чотым кугемдыман, вольык урлыкым саемдыман, у технологийым шымлыман, инвестор-влакым кычалман. Тидлан кӧра кызыт республикыште вольыкым ончымаш дене кылдалтше инвестпроект-влакым илышыш кумдан шыҥдарат. Нунын кокла гыч ик кугу инвестпроектлан «Победа» ООО-н (агропромышленный комплексын вӱдышӧ предприятийже) Калтаса, Бурай да Янаул районлаште вольыкым ончымо да шӧрым перерабатыватлыше предприятийым чоҥымыжым шотлыман.

Тиде кугу сомылын икымше йыжыҥже - Калтаса районысо Качкинтурай ялыште вольыкым ончымо комплексым чоҥымаш. Фермым 1200 лӱштымӧ ушкалым ончаш йӧнештарыме. Тушто датский селекцийын 700 утла голштин-фриз урлык ушкалым ончат. Комплексыште нылле утла еҥ пашам ышта. Чоҥымо пашам мучашлымеке, комплексыште чылаже шӱдӧ наре еҥлан паша верым ышташ шонат. Проектлан шуко жап ямдылалтме - тудым илышыш шыҥдарыме нерген Башкортостан Вуйлык Радий Хабировын эртарыме «Инвестиций шагатыште» каҥашыме.

Качкинтурайыште фермым чоҥымо сомылым тений мучашлаш палемдыме. Инвестпроект почеш чоҥымо объектым 31 январьыште Калтаса селаш республикын 2019-ше ийысе ял озанлык да вольыкым ончымо пашажым иктешлыше семинар-совещанийыш погынышо пашаеҥ-влакат ончен савырненыт. Тушто нуно вольыкым ончымо, пукшымо да моло технологий дене палыме лийыныт. Тылеч посна семинарыш мийыше-влак «Восход» ял озанлык кооперативын Торасола ялысе МТФ-ышкыжат миеныт. Тусо вольыкым ашныме, ушкалым лӱштымӧ пашам шымленыт, объект кӧргысӧ пӧлем-влакым онченыт. Туштак «Восход» СХК-н шурным аралыме вержым да машинно-тракторный паркым ончен савырненыт. Калтаса ИКЦ-н инженер-консультантше Ю. Маникаевын мутшо гыч, паркын ойыртемже - ял озанлык техника виш кава йымалне огыл, а йӧнештарыме посна ангарыште аралалтеш. Чыла тракторым ачалыме да шошо агалан ямдылыме.

Л. Шавалиева

Газета "Чолман"