УҢАЛМАЙ КҮҢЕЛ ЯРАҺЫ

Бөйөк Ватан һуғышы тиҫтә йылдар төпкөлөндә ҡалһа ла, кеше күңеле тынысланмай, уның яралары һаман да һыҙлай, тынғылыҡ бирмәй. Дәһшәтле һуғыш башланғас та, ил халҡы менән бергә яҡташтарыбыҙ ҙа алғы һыҙыҡҡа ашыҡты. Улар ҡулдарына ҡорал тотоп, илебеҙҙе дошмандарҙан һаҡланы. Һуғыштың афәтен, утты-һыуҙы үткән ветерандар һаны кәмегәндән-кәмей бара. Бөгөнгө көндә районда барлығы ун дүрт Бөйөк Ватан һуғышы ветераны ҡалды. Шуларҙың береһе Ғәлиәскәр Ғәйфулла улы Әминев.
Йөҙҙө ваҡлаусы Бөйөк Ва­тан һуғышы уҙа­ма­ны Ғәлиәскәр Әми­нев, дәһшәтле һуғыш йыл­дарында күрһәткән ҡаһар­ман­лыҡ­тары, батырлыҡ­та­ры өсөн бирелгән ор­ден-ми­ҙалдарын күкрәгенә тағып, яҡын­дары, ейән-ейәнсәрҙәре ме­нән Еңеүҙең 74-се яҙын ҡар­шы­ланы, Дан һәйкәленә барып, яу­ҙаш­та­рын иҫкә алды. Киләсәктә уға тағы ла бик күп яҙҙарҙы ҡаршы­ларға яҙһын, тип теләйбеҙ.
– Ҡәһәрле һуғыш совет хал­ҡына ауыр яралар һалды, әлбиттә. Ул ваҡыттағы хәтирәләр ғүмер буйына оҙатып килә. Беҙ күргән михнәтте йәш быуын күрмәһен,– ти ул янында тәтелдәп йөрөүсе ейәненә күҙ ташлап.
Ғәлиәскәр Ғәйфулла улы 1923 йылда Һарт-Науруз ауылында иш­ле ғаиләлә ты­уып үҫә. Бәлә­кәйҙән колхоз эшенә сума. Тех­ни­каны үҙ иткәнгә курстар бө­төрөп, хеҙ­мәт­кә алынғансы тыуған хужа­лы­ғында тракторсы була, һуңы­нан брига­дир ярҙам­сыһы булып эш­ләй. Һуғыш баш­ланғас, ҡулына ҡорал тота алырлыҡ ир-егеттәрҙең барыһын да хеҙмәткә саҡыралар.
– Ул ваҡытта хәрби комис­са­риаттан вәкилдәр ауыл Советтары буйлап йөрөп хеҙмәткә яраҡлы ир-егеттәрҙе һуғышҡа оҙаталар ине. Шул ваҡытта улар тыуған йыл­­дарыбыҙҙы бутап, минең урын­ға икенсе ауылдаш егетте ебәрәләр. Шуға күрә мин 1943 йылда ғына һуғышҡа алындым. Беҙҙе бер аҙ Өфө ҡалаһында тоттолар. Состав тулғас, эшелонға тейәп фронтҡа оҙаттылар. Ростов ҡалаһының Крас­ный Сулин ҡалаһына барып еткәс, яҡташым, күрше ауыл егетен осраттым. Уның менән тағы ла осрашып-күрешергә һүҙ ҡу­йыштыҡ. Шунан юлдар төрлө­бөҙ­ҙө төрлө яҡҡа таш­ланы. Украи­наның Запо­рожье өлкәһенә ебәр­ҙеләр. Шун­да уның менән тағы бер тапҡыр осрашырға тура килде. Гуляйполе ҡалаһын дош­ман­дар­ҙан азат иткәндә, ҡаты бәре­леш­тәрҙә тән йәрәхәте ал­дым,– тип көрһөнөп ҡуйҙы Ғәлиәскәр ағай.
Еңеүҙе яугир Румыния сиген­дә ҡаршы ала. Ете йыл хеҙмәт ит­кән­дән һуң 50-се йылдың йә­йендә тыуған яғына әйләнеп ҡайта.
Тыныс тормошта тыуған илде күтә­реүҙә бик күп көс һала, ты­рышып эшкә егелә. Тәүҙә бер ни­сә ай һатыусы була, аҙаҡ Ҡар­лыман шәкәр заводында эшләй. Ауырғазы районы Ләкәнде ауылы һылыуы Зәйтүнәне ос­ра­тып, матур ғаилә ҡоралар. Мал-тыуар, ҡош-ҡорт аҫрап, баҡса үҫтереп гөрләтеп донъя көтәләр. Улар ике ул һәм ике ҡыҙға ғүмер, матур тәрбиә бирәләр. Ҡыҙ­ғаныс­ҡа ҡаршы, Ғәлиәскәр Ғәйфулла улы тыныс тормошта ла оло ҡайғы кисерә – уның тормош иптәше һәм ике улы ла бик иртә ба­ҡый­лыҡҡа күсә. Бөгөнгө көндә тор­мошта күпте күргән, ауыр юғал­тыуҙар кисергән ветеран Рәзилә ҡыҙының ғаиләһе менән йәшәй. Дүрт ейән-ейәнсәренең, ете бүлә-бүләсәрҙәренең шатлыҡ-ҡыуа­ныс­тарын күреп, бәхетле ҡартлыҡ кисерә.
Фирүзә ЙӘМИНЕВА.
Автор фотоһы.

Фотографии: 

Подписаться на ежедневную подборку новостей