РӘССАМ ДА, ЙЫРСЫ ЛА, УМАРТАСЫ ЛА...

Йәнбәктәге һәүәҫкәр рәссам Йәмилә Рамазанованы күптән ишетеп белә инек. Уның һүрәттәре гәзитебеҙҙә баҫылғаны ла булды. Ошо яҡтарға юл сыҡҡас, ҙур ҡыҙыҡһыныу менән уны һәм башҡа эштәрен күрге килде. 
Йортона килеп инеү менән стена тулы төрлө картиналарға хайран ҡалдыҡ! Ваҡыт табып, бындай матурлыҡ булдырған ябай ауыл ҡатынына һоҡ­лан­маҫ­лыҡ түгел. Талантлы ҡатын байтаҡтан бирле ижад итә икән. 
- Бәләкәй сағымдан уҡ һүрәт төшөрөргә яраттым. Өлкәндәр эштәремде күреп шатлана тор­ғайны. Һәләтемде ишетеп, клуб һәм ауыл Советы стен­газетаһына йыш ҡына һүрәт төшөрттөләр. Ауылда 2-се клас­ты бөтөргәндән һуң, ата-әсәм миңә ҙур өмөттәр бағлап, Өфөләге 3-сө мәктәп-интер­натҡа килтерҙе. Ә инде 8-се кластан һуң 4-се һанлы ху­до­жество интернатына үҙем күс­тем. Аттестат алғас, ижад итеү­һеҙ йәшәй алмағанымды аң­лап, Стәрлетамаҡ художество училищеһына уҡырға индем. Бында профессиональ рәүештә рәссамлыҡтың бөтә нес­кәлек­тәренә өйрәндем. Унда 4-се разрядлы диплом менән сыҡ­тым, - ти Йәмилә Фәрит ҡыҙы. - Һүрәттәремдә күңелемә яҡын нимәләрҙе төшөрәм. Бала са­ғымда бик тә аттар яраттым. Һыбай йөрөргә әүәҫ булғас, ат бушаған мәлде көтөп кенә тора инем. Ағайҙарыбыҙ булһа ла, ике бер туған ҡыҙ тиреҫте аҙбарҙан алып сығып, ат менән түгә торғайныҡ. Дуҫҡа әүе­релгән малҡай янында төшкән фото ла бар. Шуға ла аттар тө­шө­рөлгән картиналарым күп. 
Яҙмыш Йәмиләне йыраҡ алып китмәй, ауылда ҡалдыра. Күршелә генә йәшәгән Илһам исемле егет менән бер-береһен оҡшатып, сәстәрен сәскә бәй­ләйҙәр. Өс улға ғүмер бирә улар. Өлкәндәре Илнур Ат­йе­тәр мәк­тәбендә уҡытыусы - ул мате­ма­тика фәненән һәм фи­зик куль­туранан балаларға бе­лем бирә. Айнурҙары Себерҙә эшләй. Ә төпсөктәре Вилнур - 9-сы класс уҡыусыһы. Йә­миләнең профес­сиональ рәс­сам булыу хыялында булһа ла, тура килмәй. Ул байтаҡ йылдар фермала һы­йырҙар һауа. Әммә ысын ижад кешеһе тик ултыра аламы һуң инде? Уй-кисереш­тәрен, тор­мош­ҡа, тә­би­ғәткә ҡарап һоҡ­ланыу­ҙарын, әлбит­тә, һынлан­ды­ра! Ауыл ерендә тауыҡ сүп­ләһә лә бөтмәҫ эштәр булһа ла, ижад өсөн ваҡыт та­бырға тыры­ша. Уның бушы­раҡ ваҡыттары һәр саҡ ирекле ижад менән бәйле. 
Картиналарында башҡорт ат­­тары, һыбайлы ҡыҙ, хужаһы ме­нән тоғро эт, тау барсы, ту­тый­ғоштар, башҡорт орна­мент­тары һәм башҡалар бар. Горо­децкая, хохлома, мозаика рос­писен ҡул­лана ул. Кухня сте­на­һы, йы­һаз­дары һәм иҙәне лә үҙен­­сәлекле һүрәттәр менән би­ҙәл­гән. Элек үҙе өсөн генә тө­шөр­һә, хәҙер ошо матур­лыҡ­ты баш­ҡа­лар­ға ла күр­һәтергә теләй. Баш­ҡортос­тан­дың 100 йыллы­ғына ҡа­рата ойош­то­рол­ған күр­гәҙ­мә­гә алып барырға тигән уйы ла бар. 
Ҡатындың һүрәттәре  күңел­де саф­лы­ғы, серле­леге, милли­леге һәм ихласлығы менән ар­бай. Уларҙан башҡорт рухы бөркөлөп тора. Оҫта ҡулдар башҡар­ған һүрәттәргә ҡарап туй­маҫ­лыҡ! Ябай ауыл ҡатыны нисек өлгөрә икән тигән һорау ҙа тыуа. “Тәүҙә ни­мә төшө­рә­сә­гемде уйлап ҡуям. Эш араһында, илһам кил­гәндә бар күңелемде һалып тотонам”, - ти ул.
Һәләтле кешелә йыш ҡына башҡа таланттар ҙа була. Йә­милә Рамазанованыҡы ла нәҡ шулай. Ул матур, көслө та­уышлы йырсы ла. Ауыл­дарын­да һәм күрше Никитинда уҙ­ғарылған саралар­ҙа моңло йыр­ҙары менән сәх­нәләрҙе биҙәй. Киләсәктә район Мәҙә­ниәт һарайында сығыш яһап, бөтә райондаштар алдында сығыш яһарға хыяллана ул. Тағы ла Йәмиләнең бер шөғөлө бар:  ул умартасы ла. “Умартасылыҡ менән һигеҙ йыл шөғөлләнәм. Атайым бал ҡорттарын ғүмер буйы тотто. Шуға ла ошо эшкә ең һыҙғанып тотонам, күңе­лемде бирәм. Ирем һәм бала­ларым миңә ярҙамсы”, - ти ул.  
Бына шундай һоҡланғыс, бай күңелле ҡатын йәшәй Йәнбәктә. Киләсәктә лә ул яҡташтарын ижади уңыштары менән һөйөн­дөрөп, илһамлан­дырып торһон! 
Фәниә Сәлимгәрәева.

 

Фотографии: 

Подписаться на ежедневную подборку новостей