Иске Кодаштан Фәрраховларны шундый дип беләләр
20.11.1966. Беренче карашка, коры саннар. Әмма Иске Кодаштан Филхәния һәм Фәнүз Фәрраховлар өчен алар бик зур мәгънәгә ия. Бу дата гашыйк ике яшь йөрәкнең бәхетле никахы башлану ноктасына әверелгән.
Алар авылны ике өлешкә бүлүче елганың төрле ярында яшәгән, өйләнешкәнче өч-дүрт тапкыр очрашканнар һәм язмышларын бәйләргә карар иткәннәр.
– 54 ел үтте бит инде, – ди бүген Фәнүз Гаим улы һәм Филхәния Ягафәр кызы.
Шул елларда шатлык һәм борчулары, бәхетле минутлары күпме булуын беркем исәпләмәгән. Бүген иске кодашлылар һәм бу гаиләне белүче барысы да Фәрраховларның нинди тату, тыйнак һәм тәртипле булуы турында сөйләр. Ә эш сөючәнлеккә килгәндә, бу сыйфат икесенең дә канында.
Фәнүз Гаим улы озак вакыт дәвамында , хәтта хаклы ялга чыккач та – 64 яшенә кадәр – туган "Урожай" колхозында шофер булып эшләгән. Филхәния Ягафәр кызы ике дистә елдан артык савучы булган, яшь чагында терлекчелектә хезмәт салган.
Фәрраховлар дүрт бала тәрбияләп үстергән. Флорид, Филина, Фира, Рафаэль – балаларына лаеклы белем биргәннәр, һәркайсының үз гаиләсе, эшлиләр, балалар тәрбиялиләр.
Ана кеше бүген дә өлкән улы Әфганстанда хезмәт иткән елларын йөрәгендә сагыш белән искә ала. Ходайга шөкер, сау-сәламәт әйләнеп кайткан.
– Балаларда әти кеше абруе кагылгысыз булырга тиеш, дип исәплим, аеруча малайларда, шул вакытта гына алар чыннан да чын ир-егет булып үсә! – ди Филхәния Ягафәр кызы.
– Шундый канун бар: әти-әниеңне хөрмәт ит. Балаларны нәкъ шулай тәрбияләргә тырыштык, – дип кушыла әңгәмәгә гаилә башлыгы. – Әлбәттә, хезмәттә тәрбияләдек.
Фәрраховларның бүген җиде оныгы һәм, үзләре әйтүенчә, әлегә дүрт туруны бар. Аларга да тормыш сабаклары бирергә тырышалар.
Ә озын бәхетле гаилә тормышы серен ачып, алар бертавыштан бер-береңә юл куя, шәфкатьле була белергә кирәк ди.
Фәрраховлар үзара мәхәббәт һәм тугрылыкка нигезләнгән гаилә кануннары ныклыгы белән халык арасында билгеле булган, шулай ук уртак хезмәт белән тәэмин ителгән иминлеккә ирешкән, балаларын җәмгыятьнең лаеклы әгъзалары итеп тәрбияләгән иң яхшы гаиләләргә тапшырылучы "Мәхәббәт һәм тугрылык" медаленә ия булган.
Раушания Гарифуллина, корреспондент газеты "Янаульские зори"
