Илһөйәрлек һәм берҙәмлек өлгөһө
Йылдан-йыл Бөйөк Ватан һуғышына бәйле данлы көндәр, ваҡиғалар артта ҡала бара. Улар менән бергә был һуғышта ҡатнашҡан, беҙгә Еңеүҙе бүләк иткән ҡаһарман ветерандарыбыҙ ҙа һирәгәйә.
Олатайым Фәйзулла Фазыл улы Хәсәнов 1914 йылда крәҫтиән ғаиләһендә тыуа. Бләкәйҙән үк зиһенле малай тиҫтерҙәренән белемгә ынтылып тороуы менән айырылып тора.
Ауыл йәштәренең ойоштороусыһы, мәҙәниәт хеҙмәткәре Фәйзулла олатайым оҙаҡламай комсомолка Сәхипъямал Ғиззәтулла ҡыҙына яусы ебәрә һәм ауылда беренселәрҙән булып “Ҡыҙыл туй” үткәрәләр.
Яҡыныбыҙ Бөйөк Ватан һуғышының тәүге көндәрендә үк беренселәрҙән булып Тыуған илебеҙҙе һаҡларға яуға китә. Ә өләсәйебеҙ Сәхипъямал Еңеү көнөн яҡынайтыу хаҡына ал-ял белмәй колхоз эштәрендә ҡатнаша. Көндөҙ ҡыр эштәрендә булһа, кисен сыра яҡтыһында фронттағыларға ойоҡбаштар, бейәләйҙәр бәйләй ҡатын-ҡыҙҙар. Бер-бер артлы ике балаһын ерләгән өләсәйебеҙ Украина яктарынан килгән ике балалы ҡатынды өйҙәренә индереп, үҙ ҡанаты аҫтына ала. Олатайымдың һәр бер хәбәрен тыны менән тартып алырҙай булып көтә. Тормош һәүетемсә генә барған көндәрҙә еләк йыйып йөрөгән балалар йүгереп килеп, өләсәйемә хәбәр еткерә. Ауыл осонда аяҡтары яралы һалдат, Сәхипъямал мине ҡабул итеп алырмы икән, тип һорарға ҡушҡан икән. Шулай итеп, ике аяғы ла ғәрип ғаилә башлығы өйөнә ҡайта.
Олатайыбыҙ ауыр физик эш башҡара алмағас, кешеләргә ҡул менән дә, һүҙ менән дә ярҙам итеп йәшәй. Һуғыштан һуңғы йылдарҙа мәктәптә лаборант булып та, магазиндарға ревизия яһаусы булып та эшләй. Күрше Алайғыр ауылында байтаҡ йылдар комсорг вазифаһын алып бара. Ҡайҙа эшләһә лә, һәр саҡ кешеләргә кәрәкле була белә. Ҡағыҙ эштәре менән ярҙамлашырға ла ауылдаштары гел уға мөрәжәғәт итер була.
Олатайым Фәйзулла менән өләсәйем Сәхипъямал биш балаға ғүмер бүләк иткәндәр. Һәр береһенә белем биреп, тормош юлына сығаралар. Иң өлкән ике ҡыҙҙары ауыр йылдарҙа иртә вафат булалар. Өсөнсө бала булып тыуған улдары Тимербәк оҙаҡ йылдар мәктәптә физик тәрбиә дәресенән уҡыта, эшендә ҙур уңыштарға ирешә. Ә ҡыҙҙары Минира һәм Рәсимә - юғары категориялы уҡытыусылар. Башҡортостан һәм Рәсәй Федерацияһының атҡаҙанған уҡытыусылары исеменә лайыҡ булдылар.
Һуғыш халҡыбыҙға ҙур һынау ҡуя. Әммә көслө рухлы, илебеҙгә бар йөрәге менән тоғро булған ата-бабаларыбыҙ берҙәмлек, тырышлыҡ менән ҙур ауырлыҡтар аша был һынауҙы еңеп сыға. Улар - илһөйәрлектең, берҙәмлектең ысын өлгөһө. Олатай-өләсәйҙәребеҙҙең ҡаһарманлығы, фиҙакәрлеге киләсәк быуындар хәтерендә мәңге һаҡланыр, тип ышанам.
Әлмира Ғилманова