Ауыл матур күркәм йорттары менән
Шундай тырыш, уңған ғаиләләрҙең береһе Олокүл ауылынан Әлфирә менән Фәнзил Камалетдиновтарҙың татыу, ҡотло ғаиләһе ауылға йәм өҫтәй. Әйткәндәй, улар “Иң матур йорт” район конкурсында ҡатнашып, лайыҡлы 3-сө урын алыуға ирештеләр. Матурлыҡ бәйгеһендә призер булырлыҡ та шул был йорт. Урамды төрлө төҫтәге матур гөлләмәләр биҙәй, баҡсалағы түтәлдәр тигеҙ бер рәткә теҙелгән, бер сүп үләнен дә күрмәҫһең. Ә инде үҙ ҡулдары менән булдырған теплицалағы йәшелсә-емештәре өлгөргән дә инде. Ихаталағы уңайлы беседка, күркәм ҡаралтылар хужаның оҫта ҡуллы булыуы тураһында үҙҙәре үк әйтеп тора.
Фәнзил Нурмөхәмәт улы Иглин районының Хөснулла ауылында тыуып үҫә. Бала сағы Салауат мәктәп-интернатында үтә. Армияға киткәнсе үк тормош юлында Үрге Тимкә ауылынан һөйкөмлө, сибәр Әлфирәне осрата. 1980 йылдың һалҡын, ап-аҡ ҡышында гөрләтеп туй үткәреп, бергә йәшәй башлайҙар. Тәүге йылдарҙа Хөснулла ауылында йәшәһәләр, 1983 йылда Олокүл ауылына күсергә ҡарар итәләр. Тәүҙә баракта торалар. 2005 йылда ер алып, күркәм йорт һалып сығалар. Ғаилә башлығы СМП-340 төҙөлөш ойошмаһына юлсы булып эшкә урынлаша. Артабан хаҡлы ялға сыҡҡансы Һамар тимер юлында (Куйбышев) хеҙмәт итә. Әлфирә Камалетдинова Олокүл балалар йортонда, һуңынан Өфө ҡалаһы дауаханаларының береһендә хеҙмәт итеп, хаҡлы ялға сыға. Камалетдиновтар ике улға ғүмер биреп, оло тормош юлына сығарған. Ҡыҙғанысҡа ҡаршы, ата-әсәгә бала ҡайғыһы ла күрергә тура килә. Улар донъя йөгөн тартып, эш менән йөрәк яраларын баҫырға тырыша. Бөгөнгө көндә Фәнзил ағай менән Әлфирә апай улдары Фәнил һәм килендәре Айһылыу менән бергә, бер түбә аҫтында йәшәйҙәр. Улар ата-әсәгә хөрмәт күрһәтеп, терәк-таяныс булып торалар. Фәнзил ағай менән Әлфирә апай бәхетле олатай һәм өләсәй. Ҙур, яҡты йорттары шат балалар тауыштарына күмелеп, донъяны йәмләй. Ейән-ейәнсәрҙәре – Оскар, Замир, Марсель һәм Элена йәшәү өсөн яңы һулыш, дәрт-дарман өҫтәй. Олатай менән өләсәй балаларға йөрәк йылыһын биреп, һөйөп-яратып, эш һөйөргә өйрәтергә тырыша.
Оҫталыҡтың юҡтыр сиктәре, тигәндәй, Фәнзил Нурмөхәмәт улының ҡулынан килмәгән эше юҡ. Йорттағы, ихаталағы бар нәмәне оҫта ғаилә башлығы үҙ ҡулдары менән эшләгән. Донъяһын бөтәйтеү өсөн бар тырышлығын һала ул. Әле Камалетдиновтар аш бүлмәһенә төкәтмә төҙөү менән мәшғүлдәр. Йәшелсә-емеш өсөн теплица ла эшләп ҡуйған. Йорт-ҡураны төҙөк тотоу ир кешенең ҡулында булһа, ҡатын йорт-ихатаһын гөл-сәскәләр менән биҙәй, өйҙәренең нурлы, ҡотло булыуы тап уның эшһөйәрлегенә бәйле. Баҡсаларында ниндәй генә йәшелсә, еләк-емеш үҫмәй! Ҡарбуздары ла өлгөргән. Уңған хужабикә ҡышҡылыҡҡа төрләндереп салаттар, ҡайнатмалар, һуттар әҙерләй.
- Баҡса тәрбиә ярата. Шуға күрә сүп үҫтерергә ярамай, иртә яҙҙан көҙгә тиклем емеш-еләктәремде, йәшелсәләремде ҡарайым, уңыш яҡшы булһын өсөн үҫентеләремде бала кеүек тәрбиәләйем. Ҡый үләндәренән арындырып, һыу һибеп, еләктәрҙең мыйыҡтарын, емеш ағастарының артыҡ ботаҡтарын киҫеп торам. Эш еңелдән булмаһа ла, һөҙөмтәһе һөйөндөрә, күңелде күтәрә. Баҡса, ауыл мәшәҡәттәре менән булыу – беҙҙең өсөн ял ғына. Балаларыбыҙ ҙа ихлас ярҙамлаша. Бергә-бергә эшләү күңелле,- ти Әлфирә апай.
Хужабикә яҡындарын тәмле аштары, ҡоймаҡ-бәлештәре менән һыйлай. Кис ултырып бәйләм бәйләй. Ә йорт хужаһы Инйәр, Ағиҙел йылғаларына барып, хатта ҡыш көнө Инйәр йылғаһына, Талпаҡ күленә балыҡ ҡармаҡларға сыға. Бынан тыш, Камалетдиновтар ғаиләһе бергәләп күңелле һәм файҙалы итеп ял да итә беләләр. Башҡортостаныбыҙҙың хозур тәбиғәт мөйөштәренә, мөғжизәле урындарына сәйәхәт ҡылалар, урман-яландарға барып, саф һауа һулап, емеш-еләк, миндек йыйып ҡайталар.
Тормоштан йәм табып, үҙ-ара аңлашып, килешеп йәшәй белһәң, донъя йәмле. Шуға ла Камалетдиновтарҙың йортонан йылылыҡ, нур бөркөлә.
Фирүзә Йәминева.
Автор фотоһы.